الشابة ليلى وهبي “15 سنة” تشكر عائلتها واصدقاءها ومدرستها لذوي الاحتياجات الخاصة في عيد ميلادها
الشابة ليلى وهبي (15 سنة) تشكر عائلتها واصدقاءها ومدرستها لذوي الاحتياجات الخاصة في عيد ميلادها: صحيح خسرت بابا اللي كان كتير مدللني ومغنجني بس اللَّه عوضني بماما و إخواتي الغاليين…بعمري ما حسيت إني مختلفة’
على صفحتها على موقع التواصل الاجتماعي فيسبوك نشرت الشابة ليلى وهبي:
عيد ميلاد مين اليوم؟
لازم كلكن تعرفو .. اليوم عيد ميلادي أنا .. اليوم صار عمري ١٥ سنة
بهل ١٥ سنة بعمري ما حسيت إني مختلفة أو إني غير الكل و خاصة من قبل أهلي .. من أنا و صغيرة ماما بتعاملني متلي متل إخواتي الباقيين ولا مرة فرقت بيناتنا إلا إنو أنا مدلعيتني أكتر
و كمان ولا وحدة من إخواتي حسستني إنو مختلفة عنها بالعكس كانوا هني رفقاتي و سندي و سبب ثقتي .. بس الشي البشع يلي مرقت عليه بحياتي هو إني فقدت جزء كبير بحياتي هو السند و الأمان و كل شي و هو “بابا”.. خلوني إحكيلكن شوي عن بابا اللَّه يرحموا .. بابا كان كتير مدللني و مغنجني و كان يحبني كتيير و ما يرفضلي طلب .. بس اللَّه عوضني ب ماما اللَّه يطولي بعمرا و يخليها فوق راسي يلي عوضتلي حنان البي و عطتني حنان الام، ماما ولا ممكن بيوم ترفضلي طلب و ولا بيوم زعلتني بالعكس بتعتبرني رفيقتها و بتاخدني معها على كل المطارح و ما بتروح بلاي .. و إخواتي الغاليين يلي أنا الدلوعة عندن ولا بيوم حرموني من الحب و الحنان ..
أنا بشكر اللَّه إنو عطاني هيك عيلة حلوة و قوية و أهم شي متماسكة ..
و أنا ما بدي إنسى مدرستي ، مدرسة الحب “مصان” يلي بفضلها أنا صرت أقوى و أشطر و يلي أمنتلي الرعاية و الحب و يلي بعتبرها عيلتي التانية ..
١٥ سنة و أنا عايشة بحبكن اللَّه لا يحرمني منكن كلكن ..
وبشكر كل مين عايدني بهيدا اليوم وفرح قلبي
بحبكن كتيرر
مصان لذوي الاحتياجات الخاصة